مدونة أحمد هتلر

من 3 اسابيع وشويه
منسي كان جايله حاله اكتئاب
وعوف كان فى الغردقه مفلس
وانا كان معايا 500 جنيه وفلوس ادسنس فى الطريق
اتصلت بمنسي اللى بقاله اسبوعين بيزن عليا علشان نروح الغردقه
احنا هنسافر النهارده
قالى لا انت بتهرج خليها بكره قلتله لا النهارده بالليل هنسافر
قالى لا بكره مش هينفع النهارده خالص .. قلت اوك ماشي
رحت شركه MCV حجزت تذكرتين تاني يوم الضهر
قبل الميعاد بساعه كان كل واحد فى البيت بيجهز نفسه للسفر
قبل الميعاد بنص ساعه كنت واقف تحت بيت احمد منسي بتصل بيه علشان ينزل
قبل الميعاد بـ 10 دقايق منسي كان بيرميلي شويه هدوم ملفوفين بسماعه سبيكر من الشباك
لووووووووول .. لو حد كان شافني كان قال حرامي غسيل وش
كفايه كده علشان مننضربش انا عارفه هزاره غبي
مش عارف بس ابوه حبكتله يتغدى وهوه بيتفرج عالتليفزيون فى الصاله يعني !!
نزل جري ومعرفش يفك الهارد بتاعه .. ميه مره اقوله اشتري فلاشه مبيسمعش الكلام
المهم وصلنا اول الشارع ..تاكسي يا جدعان
تاكسي يا شارع وادي النيل يا معفن !!
تاكسي يا كفره الاتوبيس هيفوتنا !
لقينا تاكسي اخيرا قلناله عايزينك تتطير عالموقف
وصلنا متاخرين خمس دقايق بس لقينا الاتوبيس لسه موجود
وكان في ناس مش حاجزه وبتركب وتحجز والباص واقف .. قشده يعني
اشترينا كام كيس شيبس على مولتو (عيال سيكي ميكي ياعم الحج) وقزازتين عصير منجا
اول مطب السواق فرمل الكيس خد قزازتين العصير ونزل تحت رجل السواق
شربناهم فى القاهره
الراجل قعد حوالى ساعه يلف حوالين الدائري تقولش كان نادر يلف القاهره
المهم وصلنا الغردقه بالليل وطبعا زي ماكنا متوقعين عوف الشهم واقف مستنينا فى المحطه بالتاكسي المكيف
معلش بهيس عوف طبعا واطي ومفلس قالنا اركبوا تاكسي وتعالوا انا عند فندق عرابيا
وصلنا الفندق حطينا الشنط واستغرقنا فى ثبات عميق
تاني يوم ضاع فى الاونطه زي ما بيقولوا
مابين اتصالات لغايه ما حجزنا رحله بحر ورحله سفاري
ودي شويه صور اللى قدرت اخدهم من عوف النصاب
علشان اعملهم سكان

العنوان مقطع من اغنيه مجموعه انسان للعملاق محمد عبده

النهارده بعت الريتمو للافس
بحلوها وبغتاتتها
ومش عارف هجيب ايه
فى ظل اللخبطه الموجوده فى اسعار العربيات دلوقتي
والعربيات منزلتش كتير زي ما كنت متوقع
يعني الاسعار نزلت فى حدود 6 - 4 الاف مثلا
وحتى العربيات اللى جايه من المغرب الرينو
عربيات شكلها عجيب
وحرام يبقى عليها اسم رينو اساساً
وكل ما اسال حد عن عربيه صيني يجيبلى ارتكاريا
اللى يقولى مالهاش صيانه واللى يقولى خاماتها زفت
واللى يقولي مالهاش قطع غيار ومش هتستحمل الخ الخ
وفعلا موضوع العربيه ده محير
والريتمو اللى بعتها بنص تمنها بعد سنه ونص
ومصاريف تقريبا ربع تمنها لو كنت دفعتهم مقدم لعربيه فيرنا
كان زماني مخلص نص تمنها !!
بس محدش بيتعلم ببلاش

معلومه كده :
فى بلد اسمها سلوفينيا في اوروبا
سعر العربيات المستعمله موديلات التمانينات زي الريتمو بتاعتي
بيكون فى حدود 150$
مش عارف ممكن نوصل فمصر ان العربيه تبقى بـ 700 جنيه

من كام يوم
بحرقك لقش الرز بتعمل مش عارف ايه ..
النهارده
بكبسك لقش الرز بتعمل مش عارف ايه ..

مش معنى اني من الزقازيق اني ابقى فلاح
ده تجاوز غبي من الشركه وعدم احترام للعملاء
واستهداف غير مدروس للحمله
على الاقل ابعتوا لسكان القرى
مش لسكان المدن وعواصم المحافظات
وعموما انا معرفش حد بيزرع رز
ولا عمرنا زرعنا فارضنا رز
ولا هينفع نزرع رز فيوم من الايام
لان ارضنا ببساطه ارض رمليه !!
ففكوا مني بقى ومش طالبه سبام

من ليله الوقفه
بدأت دوامه كبيره جداً
كانت فمرحله من مراحلها كفيله بانها تهدم تاريخي عالانترنت بالكامل
وانا اعترف بده لان الاعتراف بالحق فضيله
والانسان دايماً بيتعلم من اخطائه .

كوني ليبرالى او علماني
ده شيء يخصني ومعتقدش انه يخص انسان غيري
لكن فى ناس شايفه انها رسل من عند ربنا وبتطبق الامر بالمعروف
والنهي عن المنكر وده شيء يعتبر تدخل سافر فحريتي.

بدات القصه باني لقيت السيرفر عندي ممسوح بالكامل
وده نتيجه لخطأ مني فباسورد الروت كان مجرد ارقام فقط
وده تحذير للجميع سواء روت او ايميل
الباسورد يا جماعه يبقى ارقام وحروف وعلامات

مكانش في باك اب خارجي للسيرفر لاني لسه ناقله قريب جدا
وده كان السبب فان الاختراق حصل دلوقتي مش قبل كده
ويمكن دي اول مره يتم اختراق موقع ليا
وعدم وجود باك اب كان كفيل باني انتهيت كده
وابدأ من الصفر تاني
بدأت مفاوضات مع الشركه بحيث اني اقدر ارجع
باك اب للسيرفر منهم والحمد لله نجت فده بعد 6 ساعات

رجعنا الباك اب وغيرنا الباسوردات وجهزنا حمايه السيرفر
بالاستعانه بصديق اسكندراني عبيط شويه
خالد صاحب شركه سوا فور ويب

الافندي راح ونام وسابني طول الليل اشد فشعري
بس طلع جدع تاني يوم الصراحه يعني

خالد ظبط السيكيوريتي والفاير وول والخ من الاعدادات
الامنيه للسيرفر علشان نمنع الاختراق
الغريب ان مفيش ساعتين ولقيت الاختراق حصل تاني
ايه سفن ايــــــــــــــــــــه
الحق يا خالد الله يخربيتك
صلاحيات الهكر قلت صحيح
الاختراق المره دي تعديل لملف
لقيت الشيل مرفوع على موقع المدونه
طيب تمام لغيت صلاحيات الاوبن داير وشغلنا السيف مود
وقعدت اهيس شويه .. ومنك لله يا خالد !!
المهم رجعت الملفات وكله تمام وعدى اليوم بخير
تاني يوم الصبح الاقي اختراق تالت
بس المره دي تعديل فى القواعد
افتكرت انه ممكن يكون SQL injection
بس لقيت انه مستحيل
عديت عالموقع كله مفيش مجال للحقن خالص
قلت اكيد معاه بيانات واسم القاعده
غيرت الباسورد بتاع الداتا بيز
وشفرت ملف الكونفيج
ورجعت الموقع زي ماكان
والحمد لله من يومها ومحصلش اختراق للسيرفر
الاختراق حصل فحته تانيه خالص
بفتح لوحه تحكم الدومينات
ابص مالاقيش دومينات
ايـــــــــــــــــــــــــــــــــــــه سفن ايـــــــــــــــــــــــــــــــــــــــه !!!
الدومينات راحت فين
الدومينات محجوزه من Mydomain.com
ونصيحه اللى حاجز من الشركه دي ياخد دوميناته ويجري
لان الدعم الفني اول يوم بعتله
رد عليا تاني يوم
بيقولى راسل XXXXX اللى كان كاتب اسمه فى الوهو ايز
عايزني اتصل بالحرامي
اقوله والنبي رجع دوميناتي
بجد حاجه ترفع الدم وتحرق الضغط بجد يعني
بعت ابيوز للشركه وقعدت ابعتلهم فى ايميلات بالعبيط
والحمد لله بعتلهم صوره من البطاقه والباسبور ورجعوا الدومينات
حتى الان فى مشكله بسيطه فسيرفر الاغاني بتاع سمعنا
وفي اغاني مش شغاله بس الازمه دي اسبوع وهتتحل ان شاء الله
وبكده الواحد يرجع للاستقرار تاني ..

امبارح بالليل بقى
الواد الفار الكهربائي اتصل بيا
بيقولى العربيه اتخبطت
وهتعوز رفرف يمين
هو فيه ايه ؟؟؟
انا اتحسدت ولا حد عاملي عمل ولا ايه 

فى النهايه
متنسوش تشفروا الباسوردات
وتاخدوا الباك ابات
وتحمو الدومينات
ومتدوش العربيات للفار ..