أزجال عربية وأمثال شعبية…أكبر موسوعة زجل و أمثال شعبية على الانترنت

غسلت إيدى من الدم اللى ما قتلتوش

ومسحت عينى من الدمع اللى ما بكيتهوش

ولما قمت الصبح

بصيت فى وشى لقيته يشبه حد

لكنى ما عرفتوش

بدل الكوره

ولعب الفوره

وسط الغاغه

والبرجاس

تاكل زغده

تاكلك دبشه

تملا دماغك

بالقلقاس

يالا نفكر

حتة لعبه

زى السكر

بالأناناس

كلمه ومعنى

رأسى وأفقى

يحكوا حكاية

تهم الناس

قرب قرب

ياللا نجرب

شغل مخك

ولا تحتاس

واحد رأسى ؟

رأسى بتضرب

تقلب

تشغى بالأفكار

مسرح

والأفكار هوامه

فى الدوامه

ليل .. ونهار

أبيض إسود

أخضر  .. أحمر

بارد  .. حامى

جنه .. ونار

سيبك سيبك

من تغريبك

بكره الليل

يطلع له نهار

اتنين رأسى ؟

حاكم حالى

كان طرطور

خان الدار

والجار

والنور

كل ما فينا من حكام

نازلين

من خنفس .. وكافور

كذبوا ـ أفكوا

قتلوا ـ سفكوا

غدروا ـ خانوا

فضحوا ـ هتكوا

واحد أفقى ؟

شاعر داعر

ميت .. حى

طالع .. نازل

رايح .. جى 

مادح سيده

مادد إيده

لا يشوف حاجه

ولا يقول شى

كل ما فينا من شعارير

خونه

وهتيفه .. وخنازير

تجروا ـ باعوا

لمعوا ـ ذاعوا

أفوا ـ غربوا

تاهوا ـ ضاعوا

اتنين أفقى ؟

شعرا تلاته بكلمه باروده

ناظم

بيرم

بابلو نيرودا

كل ما فينا من عشاق

داقوا ما بينا

من أشواق

حبوا ـ عاشقوا

شبوا ـ نشأوا

مروا ـ فاتوا

غرسوا ـ رشقوا

رأسى وأفقى ؟

شاعر واعر

لازم جى

يملا عيون العالم ضى

كل ما فينا من أحزان

تستنظر عاشق فنان

يأتى ـ يقبل

طائر ـ بلبل

حرفى ـ فنى

يشدو ـ يغنى

وطنى سكنى

أهلى .. قومى

منكم فيكم

صحوى نومى

أنتم فكرى

أنتم عملى

منكم توقى

فيكم أملى

هيوا ـ لبوا

ثورا ـ هبوا

يشرق ـ يسطع

صبح ـ مطلع

يزرع ـ يبنى

نحصد ـ نجنى

نمرح ـ نلعب

نشدوا ـ نغنى

واحد رأسى

نشدوا نغنى

أتنين أفقى

نشدوا نغنى

تالت خامس

عاشر ميه

نشدوا نغنى

نشدوا نغنى

نملا العالم

خضره عفيه

نشدوا نغنى

نشدوا نغنى